100 տարեկանին հոգին աւանդեց Յովհաննէս ԻԳ Պապի երբեմնի քարտուղար` Կարդինալ Քափովիլլա

(Ռատիօ Վատիկան) Իտալիոյ հիւսիսային շրջան գտնուող Պերկամօ քաղաքի ''Փալացցոլօ'' բուժարանին մէջ իր հոգին աւանդեց` 100 ամեայ Կարդինալ Լորիս Ֆրանչեսքօ Քափովիլլա, Սուրբ Յովհաննէս ԻԳ երբեմնի յատուկ քարտուղարը, որ բոլորէն ճանչցուած էր իր բարութեամբ եւ պարզութեամբ։

Կարդինալ Քափովիլլա ծնած էր Փատովայի Փոնթելոնկօ գիւղաքաղաքին մէջ 14 հոկտեմբեր 1945-ին։ Քահանայ ձեռնադրուած էր 23 Մայիս 1940-ին եւ իր առաջին պաշտօնը եղած է անչափահասներու բանտի մատրանապետ։ 1945-ին որպէս քարոզիչ կը գործէ ''Ռատիօ Վենեցիա'' ռատիոկայանին մէջ, 1949-ին կը դառնայ Վենետիկի թեմին թեմական պարբերաթերթի տնօրէն։ 1953-1958 կը պաշտօնավարէ որպէս Վենետիկի պատրիարք` Կարդինալ Անճելօ Ճուզեփփէ Ռոնքալլիի քարտուղար, որ ապա 1958-ի Հոկտեմբեր 28-ին կ՛ընտրուի Հռոմի Եպիսկոպոս ու Քահանայապետ ընդունելով Յովհաննէս ԻԳ անունը։ Հայր Քափովիլլան կը փոխադրուի առ այդ Վատիկան ու կը շարունակէ իր յատուկ քարտուղարի պաշտօնը նոր ընտրեալ քահանայապետի կողքին։

26 Յունիս 1967-ին Ռոնքալլի Քահանայապետի մահուընէ ետք, անոր յաջորդը Պօղոս Զ քահանայապետը, Հայր Քափովիլլան կը նշանակէ եպիսկոպոս Քիեթի -Վասթօ թեմին, անոր շնորհելով  նաեւ եպիսկոպոսական օծում` 16 Յուլիս 1967-ին, Սուրբ Պետրոսի Մայր տաճարին մէջ։  25 Սեպտեմբեր 1971-ին Պօղոս Զ Պապը` Գերապայծառ Քափովիլլան կը նշանակէ Լորեթօ Սրբավայրի առաջնորդ։ 1988-ի` հոկտեմբեր 10-ին, գերապայծառ Քափովիլլա իր հրաժարականը կը ներկայացնէ տարիքի բերումով եւ կը քաշուի Յովհաննէս ԻԳ քահանայապետի ծննդավայր` ''Սոթթօ Ալ Մոնթէ'' գիւղաքաղաք, ուր կը նուիրուի երջանկայիշատակ Քահանայապետի գործունէութեան ու առաքելութեան տարածումին։

22 Փետրուար 2014-ին Ֆրանչիսկոս Սրբազան Քահանայապետը գերապայծառ Քափովիլլային կը շնորհէ կարդինալական տիտղոս։

Կարդինալ Քափովիլլայի մահով կարդինալական դասը կազմուած կը մնայ 213 կարդինալներէ որոնցմէ 114 քահանայապետ ընտրող իրաւունքով կարդինալներ մինչ 99 ոչ ընտրող։